Nyuma yaho Kagame yishe Col. Karegeya amunize yarangiza akabyingamba kandi akanavuga ko n’abandi bantu bose batavuga rumwe cyangwa bamurwanya nabo azabica, byanteye kwibaza byinshi. Ariko ikintu cya mbere natekereje n’abantu bose Kagame amaze kwica ariko amahanga agakomeza gufunga amaso. Byaduteye kwibaza niba urupfu rwa Col. Karegeya ruzamera nkiyicwa ry’abandi bantu benshi Kagame amaze guhitana. Dore uko tubibona:
Uwishe Perezida Habyarimana na Ntaryamira kw’italiki ya 6 Mata 1994 turamuzi kandi n’amahanga aramuzi kandi arakidegebya. Iyumvire ubuhamya bwa Abdul Ruzibiza aho yemeza ko indege ya Habyarimana yarashwe n’abasirikare bibiri ba FPR:
Uwishe Seth Sendashonga ku manywa y’ihangu mu muhanda i Nairobi, Kenya turamuzi n’amahanga aramuzi kandi aracyidegebya. Byongeye, igihugu yiciwemo cyaricecekeye! Hano twakongeraho na Col. Lizinde wicanywe n’umucuruzi Bugirimfura bose biciwe i Nairobi nka Sendashonga. Irebere iyi video ya Sendashonga iragufasha kumva iby’urupfu rwe nubwo bwose iri mu gifaransa:
Abishe Perezida Laurent Desire Kabila turabazi kandi baracyidegebya ndetse n’igihugu cye cyananiwe kutubwira uko yishwe n’abamwishe. Iyi video nayo iri mu gifaransa iratubwira uwishe Kabila ariko nkuko Dr. Rudasingwa Theogene yabitangaje Kagame newe wishe Perezida Kabila:
Uwashatse kwica Gen. Kayumba ndetse akanamuhusha inshuro 2 turamuzi ariko aracyidegebya. Ndetse n’igihugu kimucumbikiye bashatse kumwiciramo kandi twari tuzi ko ari igihugu gikomeye muri Afurika yose cyaduhejeje mu gihirahiro ntabwo kiranatinyuka kutubwira kumugaragaro uwaba yarashatse kwivugana Gen. Kayumba. Iyumvire nawe uko Rosette Kayumba, umufasha wa Gen. Kayumba asobanura uwari ushatse guhitana umugabo we:
Ntabwo niriwe ndondora lisiti y’abandi bantu bose bishwe kandi tuzi ko ari Kagame wabishe. Ariko njye hano nagirango twibaze twese hamwe niba hari ikizahinduka Afurika Yepfo ikadutangariza k’umugaragaro ko ari Kagame wishe Karegeya. Hagiye gushira iminsi hafi 19 Col. Karegeya yishwe. Ahantu yiciwe bavuze ko ari muri Hoteli ikomeye muri Afurika Yepfo gifite uburyo n’ububasha bukomeye. Muri iyo hoteli harimo ibyuma bifata amashusho kandi sinshidikanya ko no ku kibuga k’indege haba hari ibyo byuma, kuburyo nemeza ko abamwishe baramutse baravuye kuri iyo hoteli bagahita bajya gufata indege, nibura hagobye kuba hari mashusho yabo yafashwe nibyo byuma. Kuba kugeza ubu ntacyo polisi ya Afurika Yepfo iratangaza mbifata nkaho ari inkuru nziza kuri twe kuko byaba byerekana ko baba baraguye ku bimenyetso byinshi bikaba birimo bibafata umwanya mwinshi kubishyira hamwe mbere yo gutangaza uwishe nyakwigendera Col. Karegeya.
Indi mpamvu natumye nibaza ku maherezo ry’urupfu rwa Col. Karegeya n’impamvu ituma igihugu cya Afurika Yepfo cyangira umucamanza w’umufaransa Marc Trévidic kuba yahura na Gen. Kayumba na Col. Karegeya ataricwa ngo bamubwire ibyo bazi mu guhanura no kwica Perezida Habyarimana n’abari kumwe nawe. Ese Afurika Yepfo yaba hari icyo yikanga cyangwa ihisha? Ese Afurika Yepfo yaba isangiye inyungu n’ibihugu cyangwa abantu bakomeye bakingira ikibaba uwishe aba bantu bose navuze haruguru mugukora ibishoboka byose kugirango ukuri kutajya ahagaragara?
Mukurangiza nashakaga kugaruka kubyo Kagame aherutse kuvuga italiki ya 12 Mutarama 2014 mu masengesho yari yabereye muri hoteli Serena aho yigabye ko yinize Col. Karegeya. Njye nibajije icyo Kagame yari agamije yiyemeza kurenga bwa mbere umurongo utarigeze urengwa n’undi mu perezida uwe ari we wese kw’isi yose. Kagame yabaye umu perezida wa mbere kw’isi wiyemereye k’umugaragaro ko yahotoye umuntu utavuga rumwe nawe. Ese Kagame yaba yarahisemo kwemera icyaha amaze kubona ko yasize ibimenyetso inyuma simusiga bimushinja agahitamo kutanga Afurika Yepfo? Ese Kagame yaba yarahisemo kwigamba ko yishe Col Karegeya kugirango akingire ikibaba ibihugu n’abantu bakomeye bakomeje kumukingira ikibaba mu guhitana aba bantu bose navuze haruguru?
Olivier Nzabonimpa
