Amajyaruguru: Abanyamadini Barasabwa Kujya Babwira Abayoboke Kwirinda Gukorana N’umwanzi
Guverineri w’Intara y’Amajyaruguru, Bosenibamwe Aimé, arasaba abanyamadini atandukanye yo muri iyo ntara kwigisha ijambo ry’Imana abaturage bari mu madini yabo ariko banabakangurira kwirinda gukorana n’umwanzi.
Guverineri Bosenibamwe atangaza ibi mu gihe mu ntara ayoboye, mu karere ka Musanze, hamaze iminsi hafatiwe abantu, bakoranaga n’inyashyamba z’umutwe wa FDLR, bashinjwa gukora ibikorwa bihungabanya umutekano muri ako karere.
Guverineri w’Intara y’Amajyaruguru avuga ko Abanyamadini bagomba gufata iya mere mu kwigisha abayoboke babo kubungabunga umutekano kuko umutekano ari yo nkingi ya byose.
Agira ati “Abanyamadini rwose mudufashe twature, twigishe abaturage ijambo ry’Imana ariko cyane cyane babungabunga umutekano, birinda gukorana n’umwanzi. Birinda gukorana n’ibikorwa bihungabanya umutekano. Umutekano iyo wahungabanye nta bantu basenga.”
Akomeza asaba kandi n’abandi baturage bo mu Ntara y’Amajyaruguru kuba intumwa (ambassadors) z’umutekano kugira ngo muri iyo ntara hatazongera kumvikana ibikorwa bihungabanya umutekano.
Agira ati “…tugirane igihango na Leta yacu, tuvuga ngo ‘Intara y’Amajyaruguru nta na rimwe izongera kwemerera uwahungabanya igihugu wese ko yakorera kuri ubu butaka bw’iyi ntara.”
Guverineri Bosenibamwe akomeza asaba abo baturage, kugaruririra isura nziza intara y’amajyaruguru kugira ngo itazongera kugira isura nk’iyo yari ifite mu gihe cy’intambara y’amacengezi, mu mwaka wa 1997 kugeza mu mwaka wa 1998.
Abantu bafashwe, bashinjwa gukorana na FDLR ndetse guteza umutekano muke mu karere ka Musanze, barimo n’uwari umunyamabanga nshingabikorwa w’umurenge wa Cyuve, muri ako karere, bagejejejwe imbere y’ubutabera.
Ibikorwa bihungabanya umutekano bashinjwa byakozwe kuva mu kwezi k’Ukuboza mu mwaka wa 2013 kugera muri Mutarama muri 2014.
Ibyo bikorwa birimo iraswa ry’umupolisi, iterwa rya Grenade mu rugo rw’umuyobozi w’akarere ka Musanze igahitana umwana, ndetse n’iterwa ry’indi Grenade mu muhanda igakomeretsa abantu batandatu.
Ubwo abo bantu batabwaga muri yombi bafatanywe izindi “Grenades” ndetse n’imbunda bari kuzakomeza gukoresha, bahungabanya umutekano.
Ubu butumwa bwahawe abanyamadini tariki 29/4/2014, mu nama rusange yahuje umukuru w’intara y’amajyaruguru hamwe n’abavuga rikumvikana.
