Niyigena Yolande D’Argon utuye mu Karere ka Burera, Umurenge wa Gahunga, Akagari ka Kidakama, arataka ko abantu baje iwe biyita abashinzwe umutekano bamutwarira umugabo we Rwesabigwi Anastase, mu rukerera rwo kuwa 29 Werurwe 2014, none kugeza ubu ntarongera kumuca iryera.
Niyigena ni Umuyobozi wa G.S. Muhoza I muri Musanze. Afite agahinda ko kubura umugabo we avuga ko kuri iyo tariki ahagana saa kumi n’iminota makumyabiri za mu gitondo, abamujyanye bamukinguje bari kumwe n’Umunyamabanga Nshingwabikorwa w’Akagari ka Kidakama.
Niyigena ati“Bamujyana bavugaga ko hari ibyo bagiye kumubaza ko nyuma y’aho bamugarura ariko kugeza ubu ntaraza ndetse nagerageje kubaza uwo Munyamabanga Nshingwabikorwa ambwira ko atazi aho ari, ko nta n’andi makuru afite.”
Nyuma yo kubona ko Umunyabanga Nshingwabikorwa wamukinguje bamutwarira umugabo atamubwira aho aherereye, uyu mugore yagejeje ikibazo cye kuri Polisi, no ku nzego zibanze, ku Murenge no ku Karere, nabo bamuhakanira ko nta makuru bafite kuri uwo mugabo.
Ubwo IGIHE yavuganaga n’Umunyamabanga Nshingwabikorwa w’Akagari ka Kidakama, yahakanye ko ibyo Niyigena amushinja ari ukuri, ariko nawe ahamya ko uwo mugabo yabuze.
Uyu mugabo wabuze yari asanzwe ashinzwe ubuhinzi muri koperative COAMV itunganya ibigori bakavanamo kawunga n’ibindi.
Amakuru agera kuri IGIHE ni uko iki kibazo cyageze no kuri Komisiyo y’Uburenganzira bwa Muntu, abakozi bayo bageze muri ako gace kuri uyu wa 8 Gicurasi, babaza iby’ayo makuru, ariko nabwo uyu muyobozi w’Akagari abahakanira ko atigeze ajyana n’abamutwariye umugabo, nta makuru yabahaye.
Niyigena arasaba uwamubonera umugabo kumumenyesha ati“Ndabasaba kumfasha kurangisha umugabo wanjye, hagira umenyera aho ari akaturangira.”
