Author : Uwizeyimana Chantal
Umuhanzi Teta Diana (Ifoto/Ububiko)
Umuhanzi Teta Diana aravuga ko yasubiyemo indirimbo Fata fata nyuma yo kubihererwa uburenganzira na nyirayo, DJ Zizou.
Dj Zizou yemera ko ari we wahaye Teta uburenganzira bwo gusubiramo iriya ndirimbo, ariko ngo ntibemeranyijwe ku mikoresheze yayo.
Isubirwamo ry’iyi ndirimbo ryakuruye amagambo menshi mu bakunzi b’umuziki nyarwanda, bamwe barayikunda cyane ku buryo bayisaba cyane ku maradiyo, abandi ku rundi ruhande bakibaza impamvu uyu mukobwa yasubiyemo indirimbo ya Dj Zizou kandi azi ko na Dj Zizou atari igihangano cye kuko ari inshishurano.
Fata fata ni indirimbo Dj Zizou yashishuye agendeye ku njyana n’ingoma (beat) by’indirimbo yitwa Banono y’abahanzi babiri bo mu gihugu cya Zambiya, Jane Osbonne na P’Jay.
Dj Zizou yashishuye Banono akoramo Fata fata, hanyuma Diane Teta nawe asubiramo Fata Fata, iyo yasubiyemo akaba ari yo yamuhesheje amanota yo gutoranywa mu bahanzi 10 bakomeje guhatanira ibihembo bya Primus Guma Guma Super Star 4 (PGGSS 4) kuko ari yo yaririmbye.
Diana Teta nawe yemera ko akimara gushyira ku mugaragaro indirimbo “Fata fata” isubiyemo, yahise yumva abantu bamwe na bamwe bamunenga, barimo abavuga ko yabikoze kugira ajye abona uko ayicuranga muri PGGSS 4.
Abajijwe icyamuteye kuyisubiramo, kuri uyu wa 19 Werurwe 2014, yabwiye ikinyamakuru Izuba Rirashe, ati, “nagize igitekerezo cyo gusubiramo Fata fata ntaranamenya ko nzasohoka ku rutonde rw’abahanzi bazarushanwa muri PGGSS 4”.
Akimara kugira icyo gitekerezo, Diana ngo yegereye nyirayo (DJ Zizou) amusaba ko yayisubiramo, abimwemerera adashidikanya, maze ayishyira ku mugaragaro mbere y’uko amajonjora ya PGGSS 4 atangira.
Uyu mukobwa avuga ko iyi ndirimbo atayisubiyemo ngo ajye ayiririmba muri Guma Guma kuko atari azi ko azanajyamo, ndetse akaba afite n’izindi ndirimbo nka Bad man’s Love, Undi munsi, Canga ikarita na Call me, ashobora kuririmba, ibi ngo bikaba bivuze ko Fata fata atari yo kamara.
1. Iyi niyo ndirimbo Banono ya Jane Osbonne na P’Jay yashishuweho Fata fata.
2. Iyi yo hasi ni yo Fata Fata ya Dj Zizou, yashishuye kuri Banono
Iyi ndirimbo ya Dj Zizou ihuriwemo n’abahanzi batandukanye bakomeye hano mu Rwanda, barimo Jay Polly, Urban Boyz, Uncle Austin na Diana Teta
3. Iyi yo hasi niyo Fata Fata Remix (isubiyemo) ya Diana Teta
Source: http://www.izuba-rirashe.com/m-5419-byinshi-utazi-ku-nkomoko-y-indirimbo-fata-fata-n-uburyo-yasubiwemo.html