Gatsibo : Umwe yapfuye, abarenga 10 bakomeretswa n’igisasu cyaturikiye ku gasantere
Igisasu kitaramenyekana cyaturikiye mu murenge wa Gasange mu karere ka Gatsibo, ku gasantere ka Gasange kariho abantu batandukanye, maze umuntu umwe ahita apfa, abandi barenga icumi barakomereka.
Ntiharamenyekana niba iki gisasu cyaturitse mu masaa tatu n’igice z’ijoro ryo kuri uyu wa Gatandatu tariki ya 26 Mata, cyaba cyatewe cyangwa cyari giteze.
Hategekimana Samson, Umuyobozi w’umurenge iki gisasu cyaturikiyemo yabwiye IGIHE ko ubwo cyaturikaga, abantu bahise bakwira imishwaro, gusa ngo nyuma nibwo haje agahenge bagaruka kureba ikibaye ari nabwo basangaga umwe yapfuye naho abandi bakomeretse.
Abakomeretse bari kwihutanwa kwa muganga nubwo bigoranye kuko akagari ka Kigabiro iki gisasu cyaturikiyemo katagira amashanyarazi. Hari amakuru avuga ko umubare w’abakomeretse n’abapfuye ushobora kwiyongera.
Ibindi kuri iyi nkuru turacyabikurikirana…
Source: Igihe.com
