|
Bavuga ibigoramye imihoro ikarakara none Kagame aho kumva ukuri Amerika yamubwiye, yahise yirukira i Nyabihu kubwira abahatuye ko agiye kujya abarasa ku manywa y’ihangu. Mbere yuko ngira icyo mvuga kw’ijambo yabwiye aba baturage, ndagirango nawe ubanze wiyumvire ibyo yabwiye aba baturage:
Iri jambo rya Kagame ryanteye kwibaza byinshi. Ariko ryabaye gihamya ko Kagame agifite umugambi wo gukomeza kwica abahutu cyane cyane abakomoka mu majyaruguru y’igihugu ndetse akaba ariyo mpamvu njye mbona yarahisemo kujya i Nyabihu mu gikari cyaho Perezida Habyarimana avuka.
Igitangaje nuko umubare w’abaturage bari bazanywe ku ngufu kumva Kagame baba bafite abavandimwe i Kigali wababarira ku ntoki. Ariko kumva Kagame ababeshyera ko bacumbikira abajya gutera ibisasu i Kigali ariko bakabanza bakaburira abo bavandimwe babo baba i Kigali, ni ugushotorana ndetse no gushinyagura kuko abo bavandimwe babo babaga i Kigali warabamaze ubica kandi ntawe uyobowe ko ibyo bisasu biterwa na DMI yawe.
Iri jambo rya Kagame rihishe byinshi kuko njye icyo byangaragarije nuko yagiye kwifotoza nabariya baturage kugirango abacire urubanza kumugaragaro noneho azabone impamvu azatanga natangira kubica mu minsi iri mbere. Kagame nawe arabizi ko adakunzwe kandi ko haramutse hari undi munyapolitike mu Rwanda umurwanya, abaturage benshi bahita bamukurikira.
Inshuti ze nka Amerika zatangiye kumubwira ko agomba kureka guhohotera abaturage ayobora ariko igisubizo yahaye Amerika nuko ngo agiye kujya noneho arasa abatavuga rumwe nawe ku manywa y’ihangu. Naho ubundi se, FDLR yo yavuze ko idashaka intambara kandi inashyira intwaro hasi imbere ya MONUSCO ndetse n’ibihugu bikomeye nka Amerika n’abanyaburayi, ariko Kagame we akomeje kwikanga baringa kuburyo ntawe utabona ko ibi binyoma bye na FPR birimo bigenda bijya ahagaragara.
Ikindi nuko iri jambo rya Kagame riri muri gahunda ndende Kagame na FPR batangiye yo gushaka kuguma k’ubutegetsi. Barashaka guteza akaduravayo mu myaka ibiri iri mbere kugira ngo bazabwire abazungu ko nta matora agomba kuba kubera ko nta mutekano uri mu gihugu akaba ariyo mpamvu ubu bikomye Nyabihu na Musanze. Nawe wakwibaza impamvu Kagame atagiye i Butare cyangwa i Kibungo, ntabwo yajyayo ngo ahavugire ariya magambo nyandagazi kuko ikarita ya bwana ye ni FDLR kandi ntabwo iri i Burundi cyangwa Tanzania. Mwitege rero akagiye kuba mu Rwanda mu minsi iri mbere.
Numvise hari abavuga ngo Kagame n’umusazi cyangwa ngo ni bwoba ariko njye nasanze barimo bibeshya mu gusoma ibyo Kagame arimo avuga cyangwa akora. Kagame nta kintu avuga cyangwa ngo akore adafite impavu. Banyarwanda mwese mushaka ko ibintu bihinduka mu mahoro aho muri hose, ni muhaguruke mureke kumva aba bantu bibeshya ko Kagame ari mu marembera, ahubwo mukore nkaho aribwo akijyaho. Njye maze kumva ibyo Me Bernard Ntaganda yavuze agifungurwa, byanteye imbaraga zidasanzwe kuburyo numva ko buri muntu wese niyishyize mu mwanya wa Ntaganda, Kagame ntiyatera kabiri. Nawe iyumvire ingufu Me Ntaganda yasohokanye:
None se muvandimwe nawe umaze kumva Me Bernard Ntaganda, niki cyakubuza guhaguruka ngo ushyireho akawe? Kagame afite amadosiye menshi arimo atekinika kuburyo mu minsi iri mbere azashiduka yishyize hanze wese. Nawe se ntaratubwira neza icyo arimo aziza Kizito Mihigo, none yikomye abanya Gisenyi na Ruhengeri, Ntaganda yagarutse, amatora aregereje, Amerika ntisiba kumukubita agashyi ku kaganza ke, inzara yugarije abaturage, arimo ararigisa abaturage n’ibindi umuntu atarondora cyangwa atazi bimutegereje imbere. Ndi Kagame nahitamo gukorera abana be kuko aribo basigaje imyaka myinshi imbere kumurusha naho ubundi nakomeza kunangira azashiduka yicaranye na Charles Taylor, Laurent Gbagbo cyangwa yabaye nka ba Sadam, Gaddafi, Moubarak n’abandi mwese muzi. Habwirwa abumva!
Benoit Magera |
|
