Nyuma y’uko kuri uyu wa Kabiri tariki 10 Ukuboza 2013, abantu benshi bari bayobewe uburyo Perezida w’u Rwanda, Paul Kagame atitabiriye umuhango wo gusezera ku mubiri wa Nelson Mandela muri Afurika y’epfo kimwe n’abandi bakuru b’ibihugu na za Guverinoma bakabakaba 100 bitabiriye iki gikorwa ku munsi wacyo wa mbere baturutse imihanda yose y’Isi.

Uru rugendo rwa Perezida Kagame rwatangajwe ku rubuga rw’ibiro by’umukuru w’igihugu ku isaha ya saa kumi, ariko nyamara byabanje gutangazwa mbere n’umunyamakuru wa Jeune Afrique uri muri Afurika y’Epfo, Pierre Boisselet ku isaha ya saa yine n’iminota 25 z’amanywa, avuga ko Perezida kagame azunamira Mandela i Pretoria muri iki Cyumweru mbere y’uko ashyingurwa kuwa 15 Ugushyingo i Qunu ku ivuko rye.

Ubutumwa nyirizina buvuga iby’urugendo rwa Perezida Kagame uko buri ku rubuga nkoranyambaga rwa Twitter

Uru ruzinduko Perezida Kagame agiye kugirira i Pretoria ruje rukurikirana n’iminsi itanu yashyizweho mu Rwanda yo kunamira umukambwe Nelson Mandela, aho guhera kuri uyu wa Mbere tariki 10 Ukuboza, ibendera ry’u Rwanda ryururukijwe kugera muri kimwe cya kabiri kubwo guha icyubahiro gikwiye uwaranzwe no kwitanga aharanira uburenganzira no kungana bya Muntu arwanya ivangura (Apartheid).

 

Imihango yo kunamira no gusezera kuri Mandela yatangiye kuri uyu wa mbere tariki ya 10, ikazasozwa tariki 13 Ukuboza 2013, aho abifuza gusezera ku murambo we baca muri Stade ya Soccer City Stadium, aho uzagenda uzanwa buri gitondo kugeza nimugoroba, ugasubizwa mu buruhukiro, ubundi kuwa 15 Ukuboza akazashyingurwa aho avuka i Qunu muri Transkei aherekejwe n’ibikomangoma n’umuryango we n’abandi batumirwa bake batoranyijwe.

 

Imihango ijyanye no gushyingura Mandela izashyirwaho akadomo tariki ya 16 Ukuboza 2013, umunsi w’ubwiyunge muri iki gihugu. Kuri uyu munsi ishusho ya Mandela izashyirwa kuri Perezidansi y’iki gihugu.

Muri Nyaka tariki 5 ubwo Perezida Kagame yahuraga n’intwari yaharaniye uburenganzira no kwishyira ukizana bya Muntu mu mateka y’isi by’umwihariko mu kinyejana cya 20

Ubwo Perezida Kagame yahuraga na Nelson Mandela muri 2011 muri Afurika y’Epfo

Source: http://www.igihe.com/amakuru/muri-afurika/u-rwanda/article/perezida-kagame-azajya-kunamira