Ibisasu byatewe ku Kicukiro byavuye muri Al-Shabaab
Ubushinjacyaha bwa gisirikare bwavuze ko ibisasu byahitanye abantu 2 hagakomereka 46 byaguriwe Al-Shabab.
Ubushinjacyaha buvuga ko abayoboke b’imitwe ya FDLR na RNC irwanya ubutegetsi bw’u Rwanda baje kubitera ku Kicukiro nyuma yo kubigura n’umutwe w’iterabwoba wa Al-Shabab urwanya ubutegetsi bwa Somalia.
Ibi byavugiwe mu rukiko rukuru rwa gisirikare ubwo haburanishwaga urubanza ruregwamo Lt Joel Mutabazi alias Toburende n’abandi 16 bakurikiranyweho ibyaha birimo iterabwoba, ubwicanyi, kugambanira ubutegetsi buriho n’ibindi.
Ibi bisasu 2 byo mu bwoko bwa gerenade byatewe hafi y’isoko rya Kicukiro kuwa 13/9/2013 ariko icya kabiri giturika tariki ya 14/09/2014.
Muri videwo imara hafi amasaha 2 yerekanywe n’ubushinjacyaha, Nshimiyimana Joseph alias Camarade w’imyaka 27 yiyemerera ko yinjiye muri FDLR anyuze i Burundi muri 2006 aho yari muri batayo yitwa SUZUKI ikorera muri Kivu y’Epfo muri Repubulika Iharanira Demokarasi ya Kongo.
Ubushinjacyaha bwerekanye iyi videwo bushaka kwerekana ubufatanye buri hagati ya Mutabazi na Camarade ndetse n’uburyo bakoranaga na FDLR na RNC.
Videwo igaragaza ko Kamarade yayikoreshejwe n’ubushinjacyaha aziritswe amapingu ku maboko ariko agaragara nk’ufite imbaraga.
Lt Mutabazi yahakanye ibimuvugwaho byose muri iyo videwo ndetse n’ibiri mu nyandiko mvugo yakoreshejwe n’ubugenzacyaha hamwe n’imyanzuro y’urukiko rwa gisirikare ahubwo asaba urukiko ko rwasaba ubushinjacyaha kuzana telefoni bamufatanye bakerekana ubwo butumwa bavuga ko yohererezwaga na Kamarade hamwe n’ubwo yagiranaga na Kayumba Nyamwasa uyobora RNC.
Urubanza ruracyakomeje…
Source: Izuba Rirashe
