Mukantwari Bertilde w’imyaka 17 y’amavuko na murumuna we Ayinkamiye Rose bo mu Kagari k’Umukamba, Umurenge wa Kazo, Akarere ka Ngoma, baturikanwe n’igisasu cya gerenade barakomereka mu saa munani z’amanywa kuri uyu wa Mbere, bajyanwa mu bitaro bya Kibungo.
Ubwo twabasangaga aho barwariye ku bitaro bikuru bya Kibungo, Mukantwari yadutangaje ko yatoraguye iki gisasu azi ko ari icyuma gisanzwe ashobora kugurisha, atangiye kugitemesha umuhoro, murumuna we amuri iruhande kirabaturikana bakomereka mu maso, amaboko n’amaguru.
Umuyobozi w’Umurenge wa Kazo, Buhiga Josue yatangaje ko yamenye aya makuru ubwo yari mu kazi arimo kwakira ibibazo by’abaturage ahita yihutira gutabara abo baturikanywe n’igisasu babageza kwa muganga.
Buhiga yaboneyeho gusaba abaturage kwirinda gutoragura ibyuma ibyari byo byose babonye batabizi, avuga ko mu gihe umuturage wese abonye ikintu atazi neza yajya yihutira kumenyesha inzego zishinzwe umutekano, cyaba ari igisasu bakagikuraho aho kiri kugira ngo gidahitana ubuzima bw’abaturage.
Amakuru dukesha bamwe mu baganga bo ku bitaro bikuru bya Kibungo ni uko barimo kwitabwaho kandi ngo hari icyizere ko abo bakobwa bazakira bagasubira mu rugo bidatinze.
