Nkuko byatangajwe n’ ikigo kitangaza makuru cy’abafaransa kitwa RFI uyu munsi taliki ya 24 Mata 2014, leta zunze ubumwe za Amerika zatangaje ko zifite impungenge ndetse ko zihangayikishijwe n’ifungwa ridafututse ryabamwe mub’abanyarwanda harimo n’umuhanzi uzwi cyane witwa Kizito Mihigo.
Leta ya Amerika ihangayikishijwe cyane n’abantu barimo bafungwa mu Rwanda muri ino minsi mu bintu bidafututse neza ariko ikaba yibanze cyane kuri Kizito Mihigo bigaragara ko leta ya Kagame yamukoreye iyicwa rubozo bigatuma yiyemerera mu ruhame ibyaha atigeze akora kandi nta n’urubanza ruraba.
Umwe mu bayobozi ba Minisiteri y’ububanyi n’amahanga ya leta ya Amerika yatangaje ko bamaze kugeza impungenge zabo kuri leta ya Kagame ndetse banabibutsa ko bagombye gushyira imbere no kubahiriza uburenganzira bwo kureka abantu bakuvuga ibyo bashaka ntibabizire.
Uyu muyobozi wo muri Ameirika yatangaje ko kugeza ubu ntabimenyetso bafite byerekerana ko ibyo leta ya Kagame irega Kizito Mihigo nabo bafunganye ari ukuri. Ariko nkuko tumaze kubyumva twese, ibintu Kizito Mihigo aregwa kandi yiyemereye ntibyagobye kwitwa ibyaha kuko kugeza ubu ari amagambo kuburyo byagobye gufatwa nkaho ari ibitekerezo bye kandi atagobye kubizira ngo bamushyire mu gihome.
Leta ya Amerika irasaba leta ya Kagame kubahiriza uburenganzira bwo kuvuga icyo umuntu ashatse kandi atekereza ntabizire cyangwa se kudahonyora itangazamakuru. Ariko yanasabye ko abafashwe bahabwa ubutabera butabogamye nubwo ntawashidikanya ko ibi Amerika yasabye Kagame azabifata nk’ibigambo.
Ubundi Leta ya Amerika yari izwiho kuba inshuti y’ u Rwanda ikomeye, muri ino minsi isigaye iza kwisonga muri za leta zamagana leta ya Kagame kubera amabi isigaye ikora mu Rwanda ndetse no hanze y’igihugu nko guhotora Col Patrick Karegeya muri Afurika y’Epfo cyangwa gushaka kwica Gen Kayumba Nyamwasa.
Iyi nkuru yasohotse mu kinyamakuru cy’abafaransa RFI