Kuri uyu wa gatanu kuva mu gitondo kugeza hafi saa tanu z’amanywa Urukiko n’ubwunganizi bw’abaregwa bari mu mpaka z’uko hari ibishobora kuba byarirengagijwe n’Urukiko mu kuburanisha uru rubanza, niko byagenze Urukiko rwemeye ko bishoboka rusaba uregwa wumva ubifitemo ikibazo maze bose (14) barahaguruka bemeza ko bafite ikibazo cy’uburyo urubanza rwabo rwatangiyemo.
Urubanza kuri uyu wa gatanu rwavuye mu baregwa rujya mu ngingo z’amategeko hagati y’abunganizi n’abacamanza
Uyu munsi nta uregwa wigeze yumvwa, urubanza rwavuye mu magambo ashingiye ku byaha n’ibimenyetso rwimukira mu mpaka zikomeye ku ngingo z’amategeko hagati y’inteko y’abacamanza n’abunganira abaregwa barimo Me Gatera Viateur, Me Hubert Rubasha Me Ndayambaje Aminadabu na Me Saad.
Ibyakuruye impaka ni uko abunganira abaregwa bavugaga ko Urukiko rwirengagije ‘procedures’ zicibwamo mbere y’iburanisha harebwa niba Urukiko Rukuru rwa gisirikare rufite ububasha bwo kuburanisha uru rubanza ku baregwa bose, kuko harimo n’abasivile.
Ubwonganizi bwavugaga ko Urukiko rwirengagije ibyitwa “debat contradictoire”, ni ukuvuga impaka zigibwa n’impande zose (abacamanza, abaregwa n’ubushinjacyaha) kugirango bumvikane kuri niba koko Urukiko bagiye kuburaniramo rwemerewe kandi rufite ububasha bwo kuburanisha urubanza ruba rugiye gutangira. Ubwunganizi bukavuga ko iyi ‘procedures’ yirengagijwe.
Abunganizi babo basabye ko ibyaburanishijwe mbere byose byimwa agaciro urubanza rugatangira bushya, Urukiko ruvuga ko kugirango urubanza rutangire impande zose zabanje kumvikana ku buryo kongera gutangira urubanza kuri zeru bidashoboka.
Urukiko rwasobanuye ko iyo ‘procedure’ yabayeho ariko ntibafate umwanzuro kuri bubasha bw’urukiko bwo kuburanisha abaregwa bose muri uru rubanza (barimo n’abasivile) gusa kuko Ubushinjacyaha bwareze ibyaha byabereye ahantu hamwe mu gihe kimwe kandi biregerwa hamwe byari ngombwa ko abaregwa bose baburanira hamwe kuko ibyaha baregwa bibahuza bose.
Abunganizi ariko bo bavuga ko Urukiko rutereranye neza isano ibyo byaha byose bifitanye. Ubushinjacyaha bwo bwongeye gushimangira ko kuba ibyo byaha byarakorewe ahantu hamwe, igihe kimwe bikaregerwa rimwe ariyo mpamvu abaregwa bagiye bashyirwa mu byiciro nyuma hakazageda hagaragara ihuriro ry’abaregwa, maze abazagira ikibazo mu bujurire bikazasuzumwa urubanza rwaramaze kuburanishwa mu mizi.
Impaka zabaye ndende, abanyamategeko bunganira abaregwa batanga ingingo zerekana ko hari ‘procedures’ zapfuye mu iburanisha rya mbere. Byaje gutuma Urukiko ruvuga ko rugiye gufata umwiherero w’iminota 30 rugatanga umwanzuro kuri izo mpaka.
Inteko iburanisha igarutse yafashe umwanzuro ko kuko hari ‘procedure’ ya ‘debat contradictoire’ itarahawe ababurana bose, ko abaregwa bafite ikibazo ku byagiweho impaka, baza imbere y’inteko iburanisha bakabitanga Urukiko rukabisuzuma.
Abaregwa bavugwa cyane barimo Lt Mutabazi Joel, Nshimiyimana Joseph, Rukundo n’abandi bose uko ari 14 bari bahari uyu munsi, babiri ntibaje mu rubanza kubera impamvu bivugwa ko ari iz’uburwayi, bahise bahaguruka bajya imbere y’Inteko iburanisha. Muri aba bose harimo n’abemera ibyaha baregwa.
Uyu munsi kandi umwe mu baregwa witwa Nizigiyeyo Jean de Dieu (w’umusivire) wunganirwa na Me Saad yasabye ko Me Hubert Rubasha yajya mu bunganizi be, Urukiko rurabimwemerera.
Turakomeza kubakurikiranira iby’uru rubanza abaregwa baregwamo iterabwoba, gutera za grenades mu mujyi wa Kigali, gukorana n’umutwe wa FDLR n’ishyaka rirwanya Leta y’u Rwanda RNC muri ibyo bikorwa n’ibindi byaha bikomeye.
Ange Eric HATANGIMANA
UMUSEKE.RW