Dr Gasakure Emmanuel yafashwe n'isasu arapfa agerageza kwambura umupolisi imbunda
Dr Gasakure Emmanuel wari ufungiwe kuri Sitasiyo ya Polisi ya Remera mu Mujyi wa Kigali yafashwe n'isasu ubwo yageragezaga kurwanya no kwambura intwaro umupolisi wari ku kazi.
Dr Gasakure Emmanuel
Itangazo ryatanzwe na Polisi y'u Rwanda, rivuga ko Dr. Gasakure yasabye uruhushya rwo kujya mu bwiherero, ubwo yajyagayo yahuye n'umupolisi wari ku kazi ko kubacungira umutekano kuri sitasiyo aramusumira ashaka kumwambura imbunda.
amakuru aravuga ko ubu bushyamirane bwabaye ku mugoroba wo ku wa Gatatu tariki 25 Gashyantare saa 6:30, bwatumye isasu rimufata ahita apfa ariko asiga n'umupolisi yarwanyije akomeretse bikomeye.
Umuvugizi wa polisi y'u Rwanda, CSP twahirwa Celestin, yagize ati “Uwapfuye yasabye kujya kwihagarika aremererwa, akimara kuva mu buroko yahise arwanya umupolisi wari ku kazi agerageza kumwambura imbunda. Muri iyo mirwano umupolisi na we yakomeretse cyane yihutishirizwa kwa muganga (mu Bitaro Bikuru bya Polisi ku Kacyiru).”
Dr. Gasakure Emmanuel yafashwe na Polisi akurikiranyweho uruhurirane rw'ibyaha birimo kuba yarateye umuntu ashaka kumwambura, akanasiga yangije ibye, gufunga abandi mu buryo butemewe n'amategeko, no guteza umutekano muke mu baturanyi.
CSP Twahirwa avuga ko iperereza rigikomeje kuri iyi mpanuka yabaye kugira ngo wa Dr Gasakure na wo ukomeze kugezwaho amakuru mashya ku byerekeye iyi mpanuka.
Dr.Gasakure yabaye Umuganga wihariye wa Perezida Kagame, aza kwirukanwa kubera imyitwarire idahwitse mu mirimo yari ashinzwe.
Ubwanditsi
IBITEKEREZO
http://rushyashya.net/amakuru/mu-rwanda/dr-gasakure-emmanuel-yafashwe-n.html
